Noticies Toles noticies d´IX

Accesibilidá de les nueses cais

Ceres y pasos de peatones

El Grupu Municipal d'Izquierda Xunida nel Conceyu de Siero solicitó al equipu de gobiernu nes últimes comisiones informatives d'Infraestructures y Urbanismu delles midíes en relación cola accesibilidá nos núcleos urbanos del conceyu.

Per una parte, IX Siero faise ecu de la dificultá de persones con movilidá amenorgada pa cruciar por dellos pasos de cebra que, en siendo elevaos, quedaron a un nivel percima del rebaxe de la cera, lo que fai qu'elementos de la siella de ruedes topeten contra estos y torguen l'accesu a los mesmos d'estes persones. Concretamente recibiéronse quexes de los asitiaos na cai Facundo Cabeza de La Pola, pero sía que non, IX Siero solicitó la revisión de tolos que s'elevaran tantu en La Pola como nel restu de núcleos. N'esti mesmu sentíu pidióse tamién el rebaxe d'aquelles ceres que dean accesu a pasos de cebra y entá dispongan de bordiellu, lo que torga igualmente l'usu de los pasos de peatón per parte d'estes persones con movilidá amenorgada.

Amás, detectáronse rebaxes nes ceres feches nel so día que yá nun son necesarios por dexar de dar accesu rodáu a determinaos locales. Nestos casos, la propiedá (o'l Conceyu de manera subsidiaria) tendría de devolver la cera al so estáu orixinal tal qu'establez la Ordenanza Municipal de Vaos y Badenes, pero esta actuación nun se llevó a cabu na mayoría de los casos. Otramiente, tamién se tien constancia de rebaxes feches para accesos rodaos a locales ensin vau o que teniéndolu, yá nun axunten les condiciones para disponer del mesmu. Toos estos casos suponen dificultaes de circulación pales persones de movilidá amenorgada, pola irregularidá de les ceres. Pero amás, estos postreros esanicien places d'aparcamientu pos suelen disponer d'una llínea mariella pintada de forma indebida frente a ellos. IX de Siero pidió que s'estudie cada casu y procédase tamién a la so regularización cuando correspuenda.

Volver

Compartir

IU Siero - C/ Ángel Embil, 11-bajo, 33510 La Pola Siero - Tlf.: 985 72 14 43 | 684 69 03 91 - edgarg@ayto-siero.es